හීනමානය හා දවල් හීන.

තමන්ගේ දරුවා දොස්තර කෙනෙක් කරගන්න බැරි වුනු නිසා දෙමව්පියෝ ද තමන්ට නොලැබුණු permit වැනි පහසුකම් දොස්තර වරුන්ට ලැබෙන නිසා සාමාන්‍ය ජනතාව ද දොස්තරලා සමඟ තමන් සන්සන්දනය කරගන්න ගොස් තමන් ගැන උපන් හීනමානය නිසා saitm එකෙන් දොස්තරලා පිටවී ඇවිත් රජයේ වෛද්‍ය පීඨ වලින් පිටවෙන දොස්තරලාට තියෙන තැන ගන්නා තුරු දෑස් දල්වා බලා සිටිති . ගැටලුව ඇත්තේ ඔවුන්ට ලැබෙන පුහුණුව හා ඔවුන්ගේ දැනුම මත බව අමතක කරති . මුලින් එකඟ වූ පරිදි අවසන් වසර රුසියාවේ වෛද්‍ය පීඨයේ ඉගෙනුම ලබා උපාධිය සම්පූර්ණ කළානම් මේ ගැටලුව ඇති නොවනු ඇත . දැන් saitm වෙනුවෙන් කතා කළ එහි උපාධිධාරීන් ලංකාවේ ලියාපදිංචි කිරීමට කටයුතු කළ අය ලංකාවේ දොස්තරලා වෙතින් බෙහෙත් නොගන්නා බවත් ලංකාව තුළදී බෙහෙත් ගන්නේ අද දොස්තරලාටපාඩමක් ඉගැන්වීම ගැන උදම් අනන ජනතාවම බවත් තේරුම් ගන්නා විට අශ්වයා හිටපු ඉස්තාලය වත් ඉතිරි නොවනු ඇත .
ඉදිරියේදී act16 සමත් නොවූ විදේශ වෛද්‍ය උපාධිධාරීන් ද saitm අවසන් වසර විභාගය ලියා පැමිණ ලංකාවේ වෛද්‍ය හිඟය නැති කර දමනු ඇත .

ප්‍රශ්නය මෙය යැයි සිතුවද ඇත්තටම ඇත්තේ ප්‍රශ්න ගොඩකි. නිසි උසස්පෙල අධ්‍යාපන සුදුසුකම් නොමැති අය වෛද්‍යවරු වීම ඉන් පළමුවැන්නයි.

මේ  අසල්වැසි ඉන්දියාවෙ තත්වෙ

https://www.facebook.com/MEDBRO2017/?ref=page_internal&fref=nf

 

දැනට ලංකාවේ පවතින තත්වය අනුව අපට කවදාවත් හොරපාරෙන් දොස්තර කෙනෙකු වූ අයෙකු හමු නොවේයයි සිතිය නොහැක්කේ දේශපාලන මඩගොහොරුව විසින් මුලු ලංකාවම මඩ ගොහොරුවක් කර ඇති නිසාය.

 උපුටාගැනීම www.facebook.com

 උපුටාගැනීම www.facebook.com

 උපුටාගැනීම www.facebook.com

උපුටාගැනීම www.facebook.com

සමසෞඛ්‍ය උපාධිය විනාශ කිරීමට කටයුතු කළේ කවුරුන්ද යන්නත් මේ වන විට සමසෞඛ්‍ය සිසුන් තම අධ්‍යාපන කටයුතු වෙනුවෙන් එහාමෙහා ගමන් කිරීමට විඳින දුක දන්නේ එම සිසුන්මය. එය කාටත් අමතක වී ඇති දෙයකි.

උපුටාගැනීම www.facebook.com

උපුටාගැනීම www.facebook.com

උපුටාගැනීම www.facebook.com

 

උපුටාගැනීම www.facebook.com

 

උපුටාගැනීම www.facebook.com

හෙද සිසුන්ට සූතිකාගාර පුහුණුව ලබා දීමට එරෙහිව පවුල් සෞඛ්‍ය සේවිකාවන් උසි ගැන්වූයේ කවුරුන්දැයි හොඳින් පෙනුනි. අවුරුදු 3ක පුහුණුවට අමතරව හෙද සිසුන්ට සූතිකාගාර පුහුණුව ලබා දීමෙන් රෝගීන්ට අවැඩක් වන්නේ නැති බව ඕනෑම කෙනෙකුට පැහැදිලි වන දෙයකි. හෙද සිසුන්ට වඩා අඩු කාලයක් එක් අංශයක් පිළිබඳව පමණක් අධ්‍යාපනය ලබන අයට අමතරව හෙද සිසුන්ට සූතිකාගාර පුහුණුව ලබා දීම සාධාරණ වග කිසිකෙනෙකුට නොපෙනුනි. නමුත් මාධ්‍ය සංදර්ශන නිසා මහජනතාව මිඩ්වයිෆ්ලාගේ රාජකාරිය හෙදියන්ට දෙන්න යන බවට මතයක් හදා ගත්තේය.  හෙද සිසුන්ට සුතිකාගාර පුහුණුව ලබා දුන් පසු ඔවුන්ට ලැබෙන පිළිගැනීමත් පිටරටවලින්  හෙදහෙදියන් සඳහා හොඳ ඉල්ලුමක් ඉදරිපත් වූ විට ඉන් දුකට පත් වන්නේ පවුල් සෞඛ්‍ය සේවිකාවන් නොවන බව දත් දුකට හා බියට පත්වූවෝ තමන්ගේ ගැටලුව වෙනත් ආකාරයකින් ජයගත්හ.

උපුටාගැනීම www.facebook.com

සයිටම් දොස්තරලා ආපු එක හොඳයි කියමින් සල්ලි ගෙවලා ඉගෙනගත් දොස්තරලා ආවම රජයේ විශ්ව විද්‍යාලවලින් ආපු දොස්තරලාට පාඩමක් ඉගැන්වීමට හැකිවනු ඇතැයි සිතා දවල් හීන බැලූ අයට සයිටම් හා ඔවුන්ට විරුද්ධ වූ වෛද්‍යවරු එකතු වී දවල් තරු පෙන්වන දිනය තව නොබෝ දිනකින් උදා වෙනු ඇත.

මේ සිදුවන්නේ වෛද්‍යවරුන් ඇතුලු සෞඛ්‍ය සේවයේ සියලු අංශ වලට  දිට්ඨ ධම්ම වේදනිය කර්මය පළ දෙන සමයයැයි මට සිතේ. එනම් සෞඛ්‍ය සේවය යනු එකිනෙකා කෙරෙහි කුහකකම ඉරිසියාව උපරිමයටම බලපවත්වන තැනක් වන නිසාය. අනෙකා තමන්ට වඩා පඩි ගැනීමත් අධ්‍යාපන සුදුසුකම් ගැනීමත් නොරිස්සන්නන් පිරී සිටින අංශයකි.

සෞඛ්‍ය සේවයේ සියලු අංශ එකතු වූ විට දේශපාලනයට අවැසි පරිදි මඩගොහොරුවක් කිරීමට තවදුරටත් ඉඩ නැති වන බව කාහටත් නොවැටහීම රටේ අවාසනාවය.

පලි- සෞඛ්‍ය සේවය තමන්ගේ ගැටලුව ඇත්ත ඇති හැටියට දැක එකමුතු වී ජය ගැනීම පසෙක දමා වෙනත් අය කුලප්පු කර තමන්ගේ ජාම බේරාගන්නා අයගෙන් පිරී ඇති නිසා ඉහත දැක්වෙන අන්දමේ ප්‍රකාශ තවදුරටත් දැකිය හැකි වෙනු ඇත. 

ඉහත ඡායාරූප කිසිවක් මාගේ නිර්මාණ නොවන බවත් සියල්ල මුහුණුපොතින් (www.facebook.com) උපුටාගත් බව කරුණාවෙන් සලකන්න.

අපේ ආතල් එක.

ලංකාවේ ඉන්න අපි ආතල් ගන්නේ ලෝකේ කිසිම කෙනෙක් ආතල් නොගන්නා අමුතුම ආකාරයකටය. ඒ අපි ඉන්දියන් සාගරයේ (අ)මුතු ඇටේ ජහමනයා නිසාවෙන්දැයි සැක මතුවන්නේය. 

අපි පින් පව් විශ්වාස කරන නිසා පව් කිරීමට අකැමැත්තෝය. පින් කරන්න කැමැත්තෝය. අපට පින් කරන්න ගොඩාක් ආකාර විටින්විට මතුවන්නේ අපි පින් කිරීමට සැදී පැහැදී ඉන්නා නිසායැයි සිතෙන්නේය.  අපට පින් අතේ වැඩක් කරගන්න පුලුවන් කාලයක් ආයෙත් ඇවිත් තිබෙන්නේය.

විල මැද බංගලාවේ පුරප්පාඩු පුරවා පිං සිද්ධ කරගන්නත් ඒ පින ගැන හිතමින් ආතල් ගන්නත් අපට දැන් අවස්ථාව උදාවී එහෙම නැත්නම් උදා කර ඇත්තේය. අපි කැපුවත් පාට අපේ පාට නිසා අපිට ඕන පාටේ කෙනෙක් විලමැද බංගලාවට යවන්න දැන් අපට පුලුවනිය. අපේ පාට කෙනෙක් බංගලාවට නොගිහින් වෙන පාටක කෙනෙක් බංගලාවේ සැප විදිනකොට අපිට දුකය. ඒ අපේ පාටේ කෙනාට බංගලාවේ සැප විදින්න දෙන්න නොලැබුන එකටය. කොහොමහරි අපේ පාටේ කෙනා බංගලාවට ගිහින් ආතල් ගන්නාවිට අපි ඒ ආතල් බලමින් ආතල් ගන්න හරිම කැමතිය. ඒ අපේ එකා සැප විදින්න දීලා අනෙක් එකා බංගලාවෙන් එලියට ආපු නිසාය. තවත් එකෙක් ඌ කැමති පාටේ එකා බංගලාවට නොගියා කියා දුක් වෙන්නේ ඊළග වතාවේ අපේ පාටේ එකා බංගලාවට යවනවාමයි කියමින්ය. ඒ ගැන හිතමිනුත් ආතල් ගන්නේ අපිමය. 

බංගලාවට ගිය කෙනා බංගලාවේ අනෙක් අයත් එක්ක හොරා-පොලිස් කරාට හැංගිමුත්තං කලාට එහෙමත් නැතිනම් පොඩ්ඩක් රංඩු උනාට අපිට කමක් නැතිය. ඇත්තටම උන් හිතාන ඇත්තේ රටේ ලොකුම ප්‍රශ්නය විල මැද බංගලාවට හරි තැන තැන තියෙන පොඩි බංගලාවකට හරි කාලෙන් කාලෙට කට්ටිය යවන එක කියාය. ඒ වගේම අපේ යුතුකම/වගකීම උන්ව බංගලාවට යවන එක කියාය. ඉතින් අපේ එකා බංගලාවට යන්න කලින් අපි ළගට ඇවිත්, බංගලාවට ගියාම කරන්නං කීව කිසි දෙයක් නොකළාට අපිට කමක් නැත්තේ  අපේ එකා බංගලාවේ සැප විදිනවා දකින එක  අපිට ඊට වඩා  ආතල් නිසාය. 

ඒ ආතල් එක නොකැඩී අපිට එදා වේල කන්න නොලැබුනත් මොකෑ කියා හිතන්නේ අපි ඉන්දියන් සාගරයේ (අ)මුතු ඇටේ ඉන්න අමුතු අය නිසාවෙන්ය. 

ඒ අතින් A land like no other  කියනා කියමන අපේ රටේ ජහමනයාට හරියටම ගැලපෙන්නේය.

පලි: හැංගිලා වෙස්මූණු බැදගෙන හැංගිලාම නටපු සමහරු වෙස්මූණු නැතිවම එළිපිට නටන්න පටන්ගත්තු එක තවත් ආතල් එකක්ය.

ආඩම්බරයි... මාන්දමිකයි...

මාතෘකාව මටත් නොතේරෙන්නේය. ලිපියට මාතෘකාවක් අවැසිය. 

මේ දවස් කීපයේ අපි අතර ඇත්තේ විශාල තරඟයක්ය. ඒ අපි වෙනුවෙන් යමක් කරකියා ගන්නය. නමුත් යන්නේ වෙනත් කොහේවත් නෙවේය. කඩේය. කඩේ යන්නේ ගෙදරට ඕනෑ දේ ගේන්න නෙවේය. අපිට , රටට ඕනෑය කියා අපේ බදු වලින් ජීවත් වෙන කෙනෙක් තෝරා ගැනීමටය.

මේ දවස් කීපයේ අපි ඒ වෙනුවෙන් කඩේ යන්නේ තරඟයටය. අනික් කෙනාට වඩා මම කඩේ නොගියොත් වැඩක් නැත්තේය. ඒ නිසා අපි පුලුවන් උපරිමෙන් කඩේ යා යුත්තේය. නැතිනම් අපි පවුය. අපි වටේ යන අය පවුය. ඊටත් වඩා බදුමුදලින් ජීවත් වෙන්න දඟලන කෙනා පවුය. 


එක එක කාලෙට අපි කඩේ යන්නේ එක එක දේවල් වලටයි කියා මතක් වුනේ දැන්ය. මම කාලයක් කට්ටියකට කඩේ ගියේ මම කඩේ යනවායැයි ඇඩ් දමමිනි. ඒත් කාලයක් යද්දි ඒ කඩේ මුදලාලි එන්නේ කඩේ සුපර්මාර්කට් කඩයක් කරගන්න නෙවේ එයා තවත් කෙනෙක් වෙනුවෙන් කඩේ යනකෙනෙක් කියා තේරුණු නිසා කඩේ යන එක නවත්තලා දැම්මේ අනික් අයටත් කඩේ යන්න එපා කියන්නේවත් නැතිවය. කාටද පුලුවන් තමන් මෙච්චරකාලයක් ගියපු කඩේ වැඩක් නෑ කියලා කියන්න.  

අපි මේ කඩේට විතරයි යන්නෙ වෙන කඩවලට වැස්සකටවත් ගොඩ වෙන්නෙ නෑ යැයි කියා අපි කඩේ යන්නේ ඒ කඩවල මුදලාලිලාත් අපි වගේ ම අනික් කඩවලට වැස්සකට ගොඩ නොවන බව සිතාය. නමුත් ඇත්ත එය නොවේය. එයාලා අවුවටද වැස්සටද කියා බලන්නේ නැතිව අනික් කඩේට අනන්තවත් රිංගන්නේය.

ඉතින් මේ දවස් ටිකේ අපි කඩේ මාරු කරලා කඩේ යනකොට ඇඩ් නොදා කඩේ යා යුතුය.  මොකද එක කඩයක් වසා දැමුනොත් අනික් කඩේකට යන්න සිදුවෙන නිසාය. නැතිනම් අපිට යන්න කඩයක් නැතිවන්නට පුලුවනිය.

ඒත් මම කඩේ යන්නෙක්මි. 

ඒ මහත්තයා මේ ගොඩේ තියෙන ඒවා විතරයි. මේ ගොඩ 400යි. අරක 500යි.

ආ එන්න මහත්තයා. හැමදාම නෑ හැමතැනම නෑ. එන්න නෝනා. ඕන එකක් 300යි.
බලන්න මහත්තයා ඕන එකක් 300යි. තෝරලා ගන්න. හෙට නෑ අද විතරයි.

මල්ලි මේ ෂර්ට් එකේ ක්‍රීම් පාට එක නැද්ද? 

සොරි මහත්තයා ක්‍රීම් පාට නම් නෑ. කහපාට එකක් තියෙනවා දෙන්නද?

මම හෙව්වෙ ක්‍රීම් පාට එකක්. 

ඉතින් මහත්තයා කහපාට මොකක්ද ක්‍රීම් පාට මොකක්ද? දෙකම පොඩ්ඩනේ වෙනස් වෙන්නෙ.

ඒත් මට ඕන පාට නැත්නම් වැඩක් නෑනෙ.

බලන්න මහත්තයා. වෙන ලස්සන පාට තියෙනවා. රතු පාට, කොළ පාට, නිල් පාට.. එන්න නෝනා. ඕන එකක් 300යි. හෙට නෑ අද විතරයි.

හරි බලමුකො තෝරලා. මේකෙ වෙන සයිස් නැද්ද? 

තියෙනවා මහත්තයා. ඒත් මහත්තයාට හරියන්නෙ මේ සයිස් තමයි. ලස්සනට තියේවි. ෆිටෝන් කරලා බලන්න. 

මේක පොඩ්ඩක් හිරයි වගේනෙ. මීට ටිකක් ලොකු එකක් තියෙයිද?

හ්ම්ම්. සයිස් නම් තියෙනවා මහත්තයා. එත්  එක්ස්.එල් සයිස් එක 400ක් වෙනවා. පොඩ්ඩක් ඉන්න. ආ...මේ තියනේනෙ.

එතකොට ඕන එකක් 300යි කීවෙ. 

ඒ මහත්තයා මේ ගොඩේ තියෙන ඒවා විතරයි. මේ ගොඩ 400යි. අරක 500යි.

එහෙනම් එපා.

ඇයි මහත්තයා මේක මහත්තයාට හොඳට මැච් වෙනවනෙ.

ඒ වුනාට එපා. මං යන්නම්.

මොනවද මහත්තයා කරන්නෙ. ගන් නැත්තන් පාඩුවෙ යන්න තිබුණනෙ අපේ බිස්නස් පාඩු නොකර. බලන්න කෑලි 5ක් විකුණගන්න තිබුණු වෙලාව අපරාදෙ. සේරම ඇදලා දාලා එපා කියලා යනවා.

උවමනාවකට කෝල් කළාම උඹ මිස්කෝල් ගණන් කරපිය.

මොකද්ද බං උඹේ ෆෝන් එක. අල්ලලා විසි කරලා දාපං

අැයි මචං?

ඇයි තමයි තොට මම කීපාරක් කෝල් කරාද ඊයෙ හවස. එකක්වත් ආන්සර් කළේ නෑ තෝ. 

හරි බං මම දැක්කා මිස් කෝල් තියෙනවා.

මම තොට මිස්කෝල් ගැහුවෙ නෑ යකෝ. උවමනාවකට කෝල් කළාම උඹ මිස්කෝල් ගණන් කරපිය.

ඇයි බං මම උඹට එස්එම්එස් කළානෙ මම දොස්තරළඟට ආවා දතක් ගලවන්න කියලා.

තෝ දන් නැද්ද මම මැසේජ් බලන් නෑ කියලා. ඊට පස්සෙවත් ගනිනන්කො කෝල් එකක්. 

ඉතිං බං දතක් ගැලෙව්වම කොහොමද කතා කරන්නෙ?

ඇයි උඹ මෙච්චර කාලයක් ගලවපු දතින් ද කතා කළේ?

නෑ බං. ගලවපු දත තිබුනු තැනින් පුලුං කෑල්ලක් තියලා දොස්තර කීවා එ්ක හපාගෙන ඉන්න කියලා ටික වෙලාවක් යනකන්.

යකෝ ටික වෙලාව කියන්නෙ දැන් බලපන් 10ටත් කිට්ටුයි. තෝ මෙච්චර වෙලා පුලුං හප හප හිටියද? කියපංකො උඹේ ඔය දොස්තර කොහෙද ඉන්නෙ කියලා මටත් දැනගන්න.

ඩොකා කීවෙ නෑ බං උදේ වෙනකන් පුලුං හපා ගන්න.

කොහෙන්ද උඹ දත ගැලෙව්වෙ. චැනල් සෙන්ටර් ගිහින්ද?

දතක් ගලවන්න චැනල් සෙන්ටර් යනවද බං. ගෙවල් ළඟ ඩෙන්ටල් එකකට ගියෙ. 

උඹේ කුණුකමනෙ. තොට ක්ලේම් කරන්නත් පුලුවන් නේද? යන්ට එපැයි ඩොක්ට ******** ගාවට අපොයින්මන්ට් එකක් දාගෙන.

ඇයි බං ඒ ඩොක්ට දත් ගලවන්නෙ අමුතු ක්‍රමේකටද?

නෑ බං. ඌ ප්‍රසිද්ධයි නෙ. අනික නියම මීටරේ.

හරි බං. ඌ ප්‍රසිද්ධයි කියලා මම අපොයින්මන්ට් දාගෙන පෝලිමේ වාඩිවෙලා ඉඳලා දත ගලවගෙන, ක්ලේම් කරන්න ලොකු බිලක් අරන් ගෙදර එන්න ඕනි.

තොට ඉතිං කියලා බෑ නෙ. එහෙම නෙවෙයි බං ඌට එච්චර වෙලා යන්නෙ නෑ දතක් ගලවන්න. 

ඔව් ඉතින්. අපොයින්මන්ට් එකටයි දත ගලවන්නයි තව අනම්මමනම් වලටයි අතින් ගෙවාගෙන දත ගලවගන්න අපේ මිනිස්සු පෝලිමේ යනවනෙ. ඉතින් උෟ නියමට දත ගලවනවා.

හරි දැන් උඹ ගිය තැන දත ගලවන්න උඹ පෝලිමේ හිටියෙම නෑ. 

හිටිය බං. පැය බාගයක් විතර. ඒ වුනාට ඒ ඩොකා එච්චර ලොකු බිලක් දාන්නෙත් නෑ. අපොයිමන්ට් ඕනෙත් නෑ. එන කෙනා එක්ක හොඳට කතා කරනවා. උඹේ මීටර් ඩොක්ට වචන දහයක් කතා කරනවද ලෙඩා එක්ක? තොපි නමක් පස්සෙ දුවනවා සල්ලි ගෙවාගෙන. යකෝ අපිට තියෙන ප්‍රශ්නෙ අහලා තේරුම් ගන්න තැනකින් වැඩේ කරගන්න පුරුදු වෙයන්. සල්ලි ගෙවාගෙන මැෂින් එකක් පස්සෙ යන්නෙ නැතිව.

පලි- දොස්තර හැඳින්වීමට ඩොකා /ඌ යන වදන් භාවිත කළේ මේ සැබෑ සිදුවීමක් නිසාත් දොසතර මහත්තයා යන වදන අප පාවිච්චි කරනුයේ දොස්තර ඉදිරිපිටදී පමණක් නිසාත්ය. 

ඒ වුනාට කනක් ඇහිලා ඉන්න නෑනෙ.

අලුත් අවුරුද්දට ගෙදරට ආපු අසල්වැසියොත් එක්ක කතා කරකර ඉද්දි

අසල්වැසි ඇන්ටි- කොහෙද මේ පැත්තෙ උදේට හයියෙන් බණ දානව ඇහෙන්න?

මම- ඒ ඇන්ටි මේ කන්ද උඩ තියෙන පන්සලකින්නෙ.

ඇන්ටි-ඉස්සර මේ පැත්තෙ පන්සලක් තිබුන් නෑ නෙ.

මම- දැන් අවුරුදු දෙකක් විතර වෙනවා පන්සල හදලා . කැම්පස් එකේ ලෙක්චර්ස් කරන හාමුදුරුනමක් ඉන්න පන්සලක්.

ඇන්ටි- අපේ ගෙවල් පැත්තටත් හරිම හයියෙන් ඇහෙනවා.

මම- හිහි. කන්ද මුදුනෙ වගේනෙ පන්සල තියෙන්නෙ. ඔයාල ඉන්නෙ එහා පැත්තෙ කන්ද මුදුනෙනෙ.

ඇන්ටි-ඉස්සරනම් උදේට විතරයි ඇහුනෙ. ඒ වුනාට දැන් හවසටත් පිරිත් දානවා.

මම-ඒ ගමේ අය ඉල්ලීමක් කරාම බෝධි පූජා තියනවානෙ.

ඇන්ටි- ඒ වුනාට කනක් ඇහිලා ඉන්න නෑනෙ. උදේ හවස හයියෙන් පිරිත් දානකොට එපා වෙනවනෙ.

මම- අනේ ඇන්ටි. ඔයාලා රේඩියෝඑකේ බණ යද්දි හයියෙන් දාගෙන අහනඑකේ  පන්සලේ හාමුදුරුවන්ගෙන් බණ පදයක් අහන්නකො.

පලි- බෞද්ධ යැයි කියා ගන්නා ගොඩක් දෙනා නමට බෞද්ධ වන අතර එම බෞද්ධ බව උප්පැන්නයටත් සමාජයේ කැපී පෙනීමටත් පාවිච්චි කරන්නේය. බුදුදහම රැකීමට මෙවන් පොෂ් අයගෙන් සිදුවන සේවයක් නැත්තේය. සිදු වන්නේ තමනුත් අගාධයට යමින් අන් අයත් ඒ වෙත  ඇද ගැනීමයි. අයෙක් තමන් අදහන ආගම දහමට අනුව ජීවත් වේ නම් ඒ  මානසික රෝගියෙකු ලෙස ද හඳුන්වන්නේය.

සිතට, හැඟීම් වලට වහල් වී සැපත සතුට සොයා ජනප්‍රිය වීම.

රටේ විවිධාකාර අය සිටින්නෝය. සමහරු ප්‍රසිද්ධය. සමහරු ජනප්‍රිය ය. තවත් සමහරු ජනප්‍රිය හා ප්‍රසිද්ධය. නමුත් ඒ හැම දෙනා වෙනුවෙන්ම ජනප්‍රිය හා ප්‍රසිද්ධ යන වචන පාවිච්චි කරන ආකාරයේ වරදක් දක්නට ලැබෙන්නේය. 

මේ වරද බොහෝවිටම කරන්නේ ජනමාධ්‍යවේදියාය. ඒ කිසියම් නලුවකු නිළියක හඳුන්වා දෙන විට වැඩිපුරම කියන්නේ ජනප්‍රිය තරුව කියාය. එතැනට සුදුසුම වචනය එය වන අවස්ථාද ඇත. ඒ වගේම නොගැලපෙන අවස්ථාද බොහොමයකි. 

කලාකරුවා හෝ යමෙකු ප්‍රසිද්ධ වීම නිරායාසයෙන්ම සිදු වන්නේය. ඒ ඔහුගේ ඇයගේ නම කියවෙන දකින වාර ගණනට අනුලෝමවය. නමුත් ජනප්‍රිය වීම එලෙස නොවන්නේය. ජනප්‍රිය බව උපයාගත යුතු දෙයකි. එය නිරායාසයෙන් ලබා ගත නොහැකි වන්නේ එය යමෙකුගේ කියාකාරකම් වල හොඳ නරක මත රඳා පවතින්නක් වන බැවිනි. යමෙකු වැරදි එමෙන්ම සමාජ විරෝධී වැඩ කළද ප්‍රසිද්ධ විය හැකි වන්නේය. නමුත් ජනප්‍රිය නොවනේය. 

දරු පවුල් අනාථ කර කුඩා දරුදැරියන්ගේ අනාගතය අඳුරු කර වෙනත් අය කසාද බැඳි අය හඳුන්වන්නට ජනප්‍රිය යන  වදනට වඩා ප්‍රසිද්ධ යන වදන ඉතා සුදුසුයැයි මට සිතෙනුයේ මා උගෙන ඇති මට්මට ඒ අය කරනු ලබනුයේ සිතට/හැඟීම් වලට වහල් වී තවකෙකුගේ ජීවිතය අඳුරට ඇද දමමින් තම සැපත සතුට සෙවීම වන බැවිනි. නොගැලපෙන අය වෙන්වූවාට කාරි නැත්තේය. ඒ අය ගැලපෙනවායැයි සිතන අය සමඟ එක් වූවාටද කම් නැත. පවුල් දෙකක් විනාශ කරනවාට වඩා එය හොඳය. නමුත් තමන් වෙනුවෙන් කැපවූ අය ත් තමන්ගේ ලෙයින් උපන් දරුවනුත් අතරමංකර දමා සැප විඳින්නේ කෙසේදැයි ගැටලුවකි.

වාහන දැක්කාම හෙඩ් එක ඩිම් කරන්නැයි ලැයිසොම ගද්දී ඉගැන්නූවා මතකය

අද මව්බිම කියවීමි. දැන් බාප්පලා අලුත් වැඩකට අත ගසා ඇත්තේය. එනම් තවත් පාර්ට් ටයිම් ජොබ් කට්ටකි. රෑට පාරේ යන වාහනවල මූණට එන වාහන වලට හෙඩ් ලයිට් ඩිම් නොකරන මාතලීලාට රුපියල් 2500ක් දඩ ගැසීමට පටන් ගන්නේය. 

ඇත්තය . හෙඩ් ලයිට් එක මූණට වැදුනාම ඇස් නිලංකාර වන්නේය. මූණට එන වාහන දැක්කාම හෙඩ් එක ඩිම් කරන්නැයි ලැයිසොම ගද්දී ඉගැන්නූවා මතකය. ඒ ලයිසොම ගන්නා දවසේ මූණට වාහනයක් ආවොත් විතරය. ඒත් දවල් ලයිසොම ගත්තු අපට ලයිට් පත්තු කරන්න කීවේ නැතිය. ඉතින් ඉස්සරහින් වාහන ආවද නැතද අපේ ගමන අපි යන්නේ අපේ පාඩුවේ , හෙඩ් ලයිට් එකෙන්මය. අපට වැඩක් නැතිය.

ඉස්සරහින් එන වාහනේ හෙඩ් එක දැම්මද ඩිම් එක දැම්මද බස් වගේ ලොකු වාහන වල මාතලීලාට  කමක් නැත. ඒ මාතලීගේ ආසනය ඉහලට වන්නට ඇති නිසාය . ඒත් ඒ මාතලීලා හොඳය.  ඉස්සරහින් එන මාතලී ගැන අනුකම්පාව ඇත්තේය. හෙඩ් එක ඩිම් කරන්නේය. 

නමුත් උසින් අඩු වාහන වල මාතලීලාට හෙඩ් ලයිට්ටුව මාරකයක්ය. ඒත් ඩිම් නොකර යන්නේද ඔවුන්මය. මූණට එන වාහනේ හෙඩ් එක තිබුනද ඩිම් එක තිබුනද වගේ වගක් නැත. තමන්ගේ හෙඩ් එක ද  ඩිම් නොකරන්නෝය. 

තවත් මාතලීලා තොරණ වගේ බලුප් පත්තු කරපු වාහන එලවන්නෝය. එයාලා ඩිම් නොව හෙඩ් එක පත්තු නොකර හිටියත් ඉස්සරහ මාතලීගේ ඇස් නිලංකාර වන්නේය. ඒ අර තොරණේ බලුප් එලිය හෙඩ් එකටත් වඩා වැඩි නිසාය. 

සමහර විටෙක මමද මාතලී වන්නේය. කලුවරේ ද ගමන් කරන්නේය. ඉස්සරහින් වාහන ඒ නම් ඩිම් කරන්නේය. ඒ මූණට එන මාතලීගේ ඇස් නිලංකාර වන්නේ යැයි අනුකම්පාවට නොව ඒ මාතලී ඩිම් නොකළොත් මගේ ඇස් නිලංකාර වෙන නිසාය. ඒත් මං ගැන අනුකම්පාව ඇති  මාතලී  ලයිට් ඩිම් කරන්නේය. ඩිම් නොකළා කියා මම තරහ නොවන්නේය. ඒ නිසා පාර පැහැදිලිව දකින්න උවමනා නිසා මම ද හෙඩ් එක දල්වන්නේය. මට සලකන විදියටම මම ද සලකන්නේමය. 

මිනිස්සු 239ට වටිනාකම කොච්චරද? අතුරුදන් වුනේ ගුවන් යානයක් මිසක් සබ්මැරීනයක් නොවෙයි

හිතන්න පුලුවන් නේද පැහැරගැනීමක් කළානම් ඒක කරපු කණ්ඩායම සතියක් තිස්සෙ හැංගිලා ඉඳීවිද ගුවන් යානෙ මගීන් ප්‍රාණ ඇපයට තියාගත්බවට ප්‍රසිද්ධියේ ප්‍රකාශයක් නොකර. අනතුරක් වුනානම් සතියක් තිස්සෙ කිසිම ආරංචියක් නොලැබෙන්නත් හේතුවක් නෑ. මොකද යානය 100%ක්ම ගිලෙන්න විදියක් නෑ කිසිම කැබැල්ලක් පා නොවී (අතුරුදන් වුනේ ගුවන් යානයක් මිසක් සබ්මැරීනයක් නොවෙයි -ඉතින් වතුරට උඩින් ගමන් කරපු දෙයක් අනතුරට පත් වෙද්දි මොකක් හෝ කැබැල්ලක් ජලය මතුපිටට එන්න ඕන).

 

රටවල් කීයක් නම් අතුරුදන් වුනු ගුවන් යානය හොයන්න මහන්සි ගන්නවද? කී දෙනෙක්නම් ඒ ගැන හැමදාම විටින්  විට හොයනවාද? මේ ගැන කතා වෙද්දි අපේ කාර්ය මණ්ඩලේ කෙනෙක් කීවා නියම කතාවක්.

ගුවන් යානෙ අතුරුදන් කළේ කලින් කරපු සැලසුමක් අනුවයි. මොකද රුසියාව-යුක්රේනය-ක්‍රිමියාව අතර ප්‍රශ්නෙදි ඇමරිකාවට කරකියා ගන්න දෙයක් නැතිව පොඩි උන්ව බයකරන්න කතා කියමින් හිටියට කිසිම දෙයක් කරගන්න බැරි වුනා. 

තමන් කීව දේ සතේකට මායිම් නොකළ රුසියාවට ළඟින් තමන්ගෙ හමුදාව ස්ථානගත කරන්න ක්‍රමයක් නැතිව අහස පොළව ගැටලන්න කල්පනා කරපු ඇමරිකාව ගුවන් යානෙ අතුරුදන් කළා. දැන් ඒක හොයන්න අනික් රටවල් එක්ක ඇමරිකාවත් මහන්සි වෙනවා. 

දැන් ඉතින් ආසියාවෙ ගුවන්තොටුපොළවල් වරායවල් ඇමරිකාවට අවශ්‍ය විදියට පාවිච්චි කරන්න පුලුවනි කිසිම ප්‍රශ්නයක් නැතිව. මොකද බොහොමයක් රටවල් තමන්ගෙ වරායවල්,ගුවන්තොටුපොලවල් නැතිවුනු ගුවන්යානෙ හොයන වැඩේට යොදාගන්න අවසර දීලායි තියෙන්නෙ. 

ඉතින්  මිනිස්සු 239ට වටිනාකම කොච්චරද?

මේන්ටනනස් එකට කොම්පියුටරේ කූරියර් කළෙමි

බ්‍රහස්පතින්දා  5.15 පමණ

මහත්තයා මම කතා කරන්නෙ xxxx එකෙන්. ඔයාලගෙ කොම්පියුටරයක් තිබුනා නේද මේන්ටනන්ස් වලට කතා කරපු. අපි කූරියර් එකේ කෙනෙක් එවන්නම් ඒ කොම්පියුටරෙ බොක්ස් එකක දාලා මේ ඇඩ්රස් එක ලියලා තියන්න පුලුවන්ද ?

ඒක අපි බොක්ස් එකක දාලා තියෙන්නෙ. ගිය සිකුරාදානෙ අපි ඒක පැක් කරලා තිබ්බෙ.

ඒකෙ මේ ඇඩ්රස් එක ලියලාතියන්න පුලුවන්ද?

අපි ඇඩ්රස් එකත් අලවලා තියෙන්නෙ.

පොඩ්ඩක් බලන්න පුලුවන්ද මේ ඇඩ්රස් එකද තියෙන්නෙ කියලා .අංක xx , xxxx xxxx පෙදෙස, කොළඹ 5 .

හරි මම බලන්නම් . දැන්නම් මම ඉන්නෙ ඔෆිස් එකේ නෙවෙයි. මම තව පොඩ්ඩකින් බලලා කියන්නම්.
---------------------------------------------------------------------------

බ්‍රහස්පතින්දා  පස්වරු 5.35 පමණ

මහත්තයා මම කතා කරන්නෙ xxxx එකෙන්. පොඩ්ඩකට කලින් මම කෝල් එකක් ගත්තා කොම්පියුටරයක් ගැන.

හරි හරි. මම දැන් ඔෆිස්  එකේ ඉන්නෙ. මම බැලුවා බොක්ස් එක. ඇඩ්රස් එක අලවලා තියෙන්නෙ.

හරි මහත්තයා අපි හෙට උදේම කෙනෙක් එවන්නම් ඒක කූරියර් කරන්න.

ඕකේ . තෑන්ක්ස්. මම ගේට් පාස් එකත් හදලා තියෙන්නෙ. එන කෙනාට කියන්න අත්සන් කරලා අරන් යන්න කියලා මම නොහිටියොත්.

හොඳයි මහත්තයා. බොහොම ස්තුතියි.

_______________________________________________________


සිකුරාදා  පෙරවරු 9 පමණ

මහත්තයා මම කතා කරන්නෙ xxxx එකෙන්.ඊයෙ අපි කතා කළා කොම්පියුරටයක් කූරියර් කරන්න කියලා. ඒක බොක්ස් එකකට දාලා තියන්න පුලුවන්ද?

මේ මහත්තයෝ. මම ඊයෙම කීවනෙ ඒක පැක් කරලා තියෙන්නෙ කියලා. කීපාරක් පැක් කරන්න ඕනද? ගිය සිකුරාදා ඉඳලා සීපීයූ එක පැක් කරලා බලන් ඉන්නෙ. දැන් සතියක් වෙනවා. ඊයෙත් කතා කළානෙ.

සොරි සර්. අපි කූරියර් එක එවන්නම් සීපීයූ එක ගෙනියන්න.

________________________________

මිස්ටර් xxxx මම xxxx එකෙන් කතා කරන්නෙ. ගිය සතියෙ සිකුරාදා පැක් කරපු සීපීයූ එක ගෙනියන්න තවම කූරියර් එකෙන් ආවෙ නෑනෙ. ඊයෙත් ඔයාලගෙ කොම්පැනියෙන් කතා කළා. පැක් කරලා තියෙන්නෙ කීව. අදත් කියනවා පැක් කරන්න කියලා.

ඇයි සර් තවම ගෙනිච්චෙ නැද්ද?

නෑ. දැන් සතියක් තිස්සෙ සීපීයූ එක පැක් කරලා තියෙනවා. තවම කූරියර් එක ආවෙ නෑ.

ඉතින් සර් මම ගිය සතියෙ පැක් කරලාමනෙ ගියෙ. එහෙම වෙන්න බෑනෙ. දැන් සතියක් වෙනවනෙ. මම කතා කරන්නම් මටජොබ් එක දාපුකෙනාට.

තෑන්ක්ස්. මේ මැෂින් එක අපිට ඉක්මනට හදා ගන්න ඕන.

මම කතා කරලා බලන්නම් සර්.

________________________________________
 
සිකුරාදා  පෙරවරු 10 පමණ

සර්  මම කතා කරන්නෙ xxxx එකෙන්. මේන්ටනන්ස් වලට කතා කරපු සීපීයූ එක බොක්ස් එකකට දාලා මේ ඇඩ්රස් එක ලියලා තියන්න පුලුවන්ද අපි කූරියර් කෙනෙක් එවන්නම්.

මිස්. ඒ මැෂින් එක බොක්ස් එකකට දාලා පැක් කරලා ඇඩ්රස් එක ලියලා තියන්නෙ ගිය සිකුරාදා ඉඳලා. තව කීපාරක් කී දෙනෙක් කතා කරයිද මේක පැක් කරගන්න.

හරි සර් අපි කූරියර් කෙනෙක් එවන්නම් අද හවස් වෙන්න කලින්.

අපිට මේ මැෂින් එක හදාගන්න ඕන. නැතිනම් ඔයාලට කතා කරන්නෙ නෑනෙ. වොරන්ටි නැත්නම් මේන්ටනන්ස් නැත්නම් මොකටද  ඔයාලට අපි සල්ලි ගෙවන්නෙ. මැෂින් එක නැතිව අපිට වෙන අලාබෙ කවුද ගෙවන්නෙ.

සොරි සර් අපි ඉක්මනට ඒක හදලා එවන්නම්.
---------------------------------------------------
සිකුරාදා  පෙරවරු 11.30 පමණ
මහත්තයා මම කතා කරන්නෙ ............. කූරියර් කම්පැනි එකෙන්. අපිට පාර්සල් එකක් කූරියර් කරන්න බාර දුන්නා ....... කම්පැනි එකෙන්. ඒක පැක් කරලාද තියෙන්නෙ.

ඒක පැක් කරලා තියෙන්නෙ ගිය සිකුරාදා ඉඳලා. ඒ ගැන ඔයාලට කියන්න ඇත්තෙ අද උදේ.

ඔව් සර් අපිට අද උදේ තමයි දැනුම් දුන්නෙ. අපේ කෙනෙක් ඒවි ඒ පාර්සල් එක ගෙනියන්න. හවස ඔෆිස් එක වහුවම ආවොත් පොඩ්ඩක් බලන්න පුලුවන්ද?

හොඳයි මම බලන්නම්.

________________________________

සිකුරාදා පස්වරු 3 පමණ

මහත්තයා මම කතා කරන්නෙ ............. කූරියර් කම්පැනි එකෙන්. මම ආවෙ කූරියර් අයිටම් එක ගෙනියන්න.

හරි. ඒක අපි පැක් කරලා තියෙන්නෙ. මම නම් දැන් එලියෙ ඉන්නෙ. පොඩ්ඩක් සිකුරුටිගෙන් ඉල්ල ගන්න පුලුවන්ද?

මහත්තයට පුලුවන්ද පොඩ්ඩක් ඇවිත් පාර්සල් එක දෙන්න?

මම දැන් එලියෙ ඉන්නෙ. මම එද්දි වෙලා යාවි. ඔයා සිකුරුටිගෙන් අරන් යන්න.

එයාලා දන්නවාද දන් නෑනෙ පාර්සල් එක ගැන. මම පොඩ්ඩක් ඉන්නම් සර් එනකන්.

මම එද්දි තව පැයකට වඩා යාවි. සිකුරුටිට මම කියලා තියෙන්නෙ ගේට් පාස් එක අත්සන් කරලා අරන් යන්න.


(නම් ගම් සැඟවිය යුතු විය)

ඇංඩ්‍රොයිඩ් පෝං. මල් පැල හිටවන්න විතරයි.

මදැයි කාලෙකට පස්සෙ බ්ලොගේ පැත්තෙ ආවා. ලියන්න පටන් අරන් මාත්තුරුකාව දානකොටම පබිලිස් වෙලා.

බලපු බලපු අත අැන්ඩ්‍රොයිඩ් හරි මොකක් හරි ටච් ස්ක්‍රීන් පෝං එකක්. කන් දෙකේ ඇබ ගහාගත්තු අය එහෙ මෙහෙ යනවා. ඒත් ඉතිං කීයෙන් කීයද ඒ පෝං එකෙන් සිංදු අහනවාට පේස්බුක් යනවාට කෝල් ගන්නවාට වඩා දෙයක් කොරන්නෙ?

ඇංඩ්‍රොයිඩ් පෝං කියන්නෙ අපිට ඉතා හොඳ ගමන් සගයෙක්

පාරක් හොයා ගන්න, නැතිතිනම් පොටෝ එකක් අල්ලන්න, ජංජාලෙ කැරකෙන්න තව ගේම් ගහන්න ෆිල්ම් බලන්න කලුවරට ටෝච් එකක් ඒ විතරද කාලසටහන් දා ගන්න දිනපොත් ලියන්න ගනුදෙනු සටහන් කරන්න එකී නොකී කීයක්නම් දේ කරන්න පුලුවනිද.

ඒත් ඉතිං කලිං පාවිච්චි කරපු පෝං වගේ නෙවෙයි. හරි ඉක්මනින් බැටරි බහිනවා. ඒ නිසා මල් පැල හිටවන්න පාවිච්චි කළාට මල් කඩන්න නම් ඒ තරම් සුදුසු නෑ වගෙයි.

හැම දේකින්ම දෙක දෙක (එහෙ එකයි- මෙහෙ එකයි)

අයියා "පොඩිපින් චාජර් එකක්" තියෙනවාද?

නෑ මල්ලි. ඒත් උඹ මේ ළඟදි දවසක නේද චාජරේ ගත්තෙ. ඒකත් කැඩිලද?

නෑ අයියා. මම ඒක ගෙදර දාලා ඇවිත්

ඒ මොකද බන් ගෙදර ගෙනිච්චෙ. උඹ වැඩියම ඉන්නෙ මෙහෙනෙ.

ඉතින් අයියා ගෙදර ගියාම ෆෝන් එක චාජ් කරන්න ඕනනෙ.

ඉතින් බං ගෙදර වෙනම චාජරයක් තියා ගන්න එපැයි. එතකොට අමතක වෙන් නෑනෙ

ඒකත් නියම අයිඩියා එක. එහෙ එකයි- මෙහෙ එකයි. එතකොට ගෙදරත් මෙහෙ තියෙන දේ තියෙනවා . මෙහෙදිත් ගෙදර තියෙන හැම දේම තියෙනවා. අයියා ගෑනුළමයටත් එහෙම කරන්න බැරිද?

ජීවිතයට සතුට ළඟා කරද්දි එය වදයක් වගේ හිතෙනවානම්..

ජීවිතයක් අදුරින් එළියට ගන්න උදව් කරන එකත්
ජීවිතයට මාර්ගය විවෘත කරලා දෙන එකත්
හොඳ පින්කමක්...

ඒ පින්කම හැමෝටම කරන්නත් බෑ.. ඒ වුනත් උවමනාව තියෙනවානම් ඕනැම කෙනෙකුට කරන්න බැරිකමකුත් නෑ..

ජීවිතයට සතුට ළඟා කරද්දි එය වදයක් වගේ හිතෙනවානම්..
එතැන තියෙන්නෙ නොලැබීම මිසක් වෙන මොකක්ද?

අයාලේගිය , හීන ලෝකයේ සැරිසරමින් තිබුනු ජීවිතය
නිසිමඟට යොමු කරවනඑකත් කරන්න පුලුවන් වෙන්නෙ එහෙමත් කෙනෙකුටයි..

ඒ වෙනුවෙන් ඉවසීම කොතරම් උවමනා වේවිද?
ඒ වගේම අවබෝධය..?

අනෙකාට ගරුකරන්නත් ඇහුම්කන්දෙන්නත් ඒ වගේම තමන්ගෙ වැරදි අඩුපාඩු නිහතමානිව අවබෝධ කරගෙන ඒවා නිවැරදි කරගන්න පුලුවන් වෙන්නෙත් එහෙමත් කෙනෙකුටයි
ඒ අය කොතරම් සාර්ථකත්වයක් අත් කරගන්නවාද කාලයත් සමඟම

කතාවක් තියෙනවානෙ පවට පින් දෙන්න බෑ කියලත්..

හීන දකිමින් සිටි ලෝකය ආගිය අතක් නැතිව ඇතිසෙයකි..

හීනෙන් දකින්නෙ
අපේ හිතේ තියෙන ලෝකය
සැබෑ වුනා වගෙයි
නමුත් හැබෑ ලෝකයේදි ඒ හීනය
සැබෑවක්ම වෙමින් පැවතී
බිඳවැටුනු විට
ලෝකයම විනාශවුනේයැයි හැඟී
හැම දෙයක්ම එපාවී ගියත්
ඒ බිඳවැටුනු ලෝකයෙන් එපිට
තවත් ලෝකයක් තිබෙන බව පෙනෙන විට
හීන දකිමින් සිටි ලෝකය
ආගිය අතක් නැතිව ඇතිසෙයකි..

හිත ගිය තැන මාළිඟාව....

සාර්ථකවීම් අසාර්ථකවීම් රාශියක් අතරින් මේ දවස්වල ජීවිතේ ගලාන ගියාට හිතේ සතුටක්ද අසතුටක් ද තියෙන්නෙ කියලා හිතාගන්නවත් බැරි තත්වයක මම හිරවෙලා...

ඒ අතරෙ මානව සම්බන්ධතා පැවැත්වීම අපේ රැකියාව නිසා අපි හමුවට එන අය තරහා නොවන ආකාරයට ඒ අයත් එක්ක ගනුදෙනු කරන්නත් වෙනවා

සමහර ගනුදෙනුකරුවන් කරන කියන දේවල්වලදි කොච්චර තරහා ගියත් ඒ බව නොපෙන්වා හිනාවෙලා මිත්‍රශීලීව කතා කරන එක දැන් නම් ගොඩක් දුරට ඇඟටම බද්ධ වෙලා වගේ. ඒ වුනත් සමහර අවස්ථා තියෙනවා අපි උවමනාවට වඩා පාගන්න එන අවස්ථා. ඒ වගේ වෙලාවන්වලදි ඇඟට නොදැනී ඒවා නවත්තන්නත් අමාරුම වුනොත් කෙලින්ම මොනවා හරි කියලාදාන්නත් සිද්ධ වෙනවා. ඒ වගේ මොහොතවලදි කපටිකම කියන දේ ගොඩක් උපකාරි වෙනවා මට නම්. මොකද හිනා වෙන ගමන්ම අදාල තැනට හරියටම වදින විදියට කතාකරන්න කපටිකම ඉතාමත් වැදගත් මට නම්.

ඒ අතරෙ උදේ ඉඳන් ආතතිය මැද ගෙවන ජීවිතයට වෙනසක් එක් කරන්නත් සමහරු උත්සාහ කරනවා එක එක විදියෙ උදව් අපිට කරන්න ඇවිත්.  ඒ උදව් එපා කියන්න කොච්චර උත්සාහ කරත් ඊළඟ වතාවෙත් ඇවිත් ඒ ගැනමයි කතාව. මට ගැලපෙන ගැහැනුළමයෙක් හොයන වැඩේ මටත් හොරෙන්ම වෙනත් අයට පවරලා මගෙත් එක්කම ඉන්න කෙනෙක්. මට කිසි දෙයක් කරන්න එපාලු. ඒ අය උත්සාහ කරලා මට ගැලපෙන කෙනා හොයන්නම්ලු. එතකොට මට තියෙන්නෙ ඒ  අය හොයලා දෙන කෙනාට කැමති වෙන්න විතර(ද)? මම බලාපොරොත්තු වෙන්නෙ කොහොම කෙනෙක්ද කියලා ඒ අය දන්නවා ද? මේ වැඩ වලින් අන්තිමට වෙන්නෙ මාව චාටර් වෙනඑක කියලානම් මට ෂුවර්. ඒත් ඉතින් මේ මිනිස්සුන්ට එපා කීවාට අහන එකක්යැ. කොහේහරි ඉන්න අවුරුදු 26ක් 27ක් වෙන කෙනෙකුගෙ විස්තර හොයලා මට කියනවා. දැන් ඒක හැමෝගෙම විනෝදාංශය වෙලා වගේ. එක්කො ඒ කියන කෙනාව මට මුනගැස්සුවානම් අඩුගානෙ මුනුපොතේ මිතුරුකැලට එකතුකරගන්නවත් තිබුනා.

අද හවස මම යාලුවෙකුගෙ ගෙදර ගිය වෙලාවෙ දි මේ ගැන කතා කරද්දි යාලුවාගෙ අම්මා නම් කීවෙ " ජීවිතේ සමහර අවස්ථා තියෙනවා අපිට ඒ අවස්ථා ලැබෙන්නෙ සීමිත කාලයයි. ඒ කාලය තුලදි අපි ඒ අවස්ථාවලින් ප්‍රයෝජන නොගත්තොත් පසුකාලයකදි ඒ අවස්තාව ලබා ගන්න අමාරු වෙනවා. සමහරවිට නොලැබී යන්නත් පුලුවන්. " කියලායි. ඒ කියන්නෙ මේ අවස්ථාව මම පාවිච්චි කරන්න ඕන කියන එකද?

ඒ වුනාට හිත ගිය තැන මාළිඟාව කියනවානෙ. බලමු ඉස්සරහට අලුත් මාලිඟාවක් හදන්න අත්තිවාරමක් දාන්න වේවිද පරන අත්තිවාරමෙන්ම මාළිඟාව ගොඩනගන්න පුලුවන් වේවිද කියලා..

ඒ අතරෙ මතක් වෙනවා විභාගෙ ළඟයි නේද කියලා

ලබන සතිඅන්තෙ විභාගෙලු..

ප්‍රොජෙක්ට් එක.. තවම බාගෙට කරලා තියෙන්නෙ..
විභාගෙන් පස්සෙ ඒකත් සබ්මිට් කරන්න ඕනලු..

උදේ නැගිටින්නෙ.. අදනම් පුලුවන් ඉක්මනට ගෙදර ඇවිත් පාඩම්කරනවා කියලා හිතාන..
බ්‍රාන්ච්එකෙන් එලියට එන්නෙත් ඉක්මනට ගෙදරගිහින් පාඩම්කරන්න හිතාගෙන..

ඒත් ගෙදර ආපුගමන් ලැප්එක ඔන් කරගෙන හෝම්පේජ්ටික ලෝඩ් කරගන්නවා..
ටික කියලා කිවෙ.. මුනුපොතයි, ගුගල්රීඩරෙයි
ඊට පස්සෙ ඉතින් ඕපාදුප ටික කියවකියව ඉන්නවා

ඒ අතරෙ මතක් වෙනවා විභාගෙ ළඟයි නේද කියලා
ඉතින් ඒ වෙලාවට හිතනවා හෙට උදේම නැගිටලා පාඩම් කරන්නම් කියලා
රෑ වෙනකන් ඇහැරිලා ඉඳලා නිදාගෙන උදේ නැගිටලා හිතනවා හවස පාඩම් කරන්නම් කියලා

බලානයද්දි මම කරන්නෙ පාඩම් කරන්න වෙලාව වෙන්කරන එක විතරයි වගෙයි.

නිව්ටන් පොල්ගහක් යට ඉන්නෙ නැතුව ඇපල්ගහක් යටටම වෙලා හිටියෙ නිව්ටන්ගෙම වෙලාවට තමයි.

ඇපල් ගහක් යටට වෙලා හිටපු නිව්ටන් ගෙ ඔලුවට ඇපල් ගෙඩියක් වැටුන නිසා ගුරුත්වාකර්ෂණය හොයා ගත්තලු.

හොඳ වෙලාවට ඒ ඇපල්ගෙඩිය නිව්ටන්ගෙ ඔලුවටම වැටුනෙ. ඒ වගේම නිව්ටන් පොල්ගහක් යට ඉන්නෙ නැතුව ඇපල්ගහක් යටටම වෙලා හිටියෙ නිව්ටන්ගෙම වෙලාවට තමයි.

නිව්ටන් ඉපදුනේ හරි ජීවත්වුනේ හරි ලංකාවෙ වුනානම් නිව්ටන්ට සොරිම තමයි. මොකද අපේ රටේ ඇපල්ගස් තියෙනවා කියලායැ. ඒ වගේම ගහක්යටට වෙලා ඉන්න තරම් නිදහසක් තියේවියැ නිව්ටන්ට වුනත්.

බැරිවෙලාවත් ඇපල්ගෙඩිය ඔලුවට නොවැටී අතට වැටුනනම්, නිව්ටන් ඇපල්ගෙඩිය කාලා තමන්ගෙපාඩුවෙ අනුන්ගෙ වැඩක් බලාන ඉඳීවි.

එහෙම වුනානම් කොහෙන්ද අපිට ගුරුත්වාකර්ෂණය කියලා දෙයක්..?